Parlamenti i Sllovakisë ka miratuar një ligj të ri që përcakton zyrtarisht se ekzistojnë vetëm dy gjini: mashkull dhe femër. Vendimi u shoqërua me debate të nxehta, por në fund shumica parlamentare e konsideroi të nevojshme “qartësimin ligjor” të këtij koncepti.

Amandamentet e miratuara prekin dokumentet zyrtare dhe regjistrat civilë, duke i dhënë fund çdo pasigurie juridike mbi mënyrën se si regjistrohet identiteti gjinor. Sipas mbështetësve të ligjit, ky hap synon të shmangë “keqinterpretimet” dhe të harmonizojë legjislacionin me atë që ata e konsiderojnë si realitet biologjik.

Ky vendim ka gjasa të ndezë edhe më shumë debatet brenda Bashkimit Europian, ku disa vende janë më liberale në çështjet e identitetit gjinor, ndërsa të tjera ndjekin linjën më konservatore.

Ndërkohë, në Shqipëri debati mbi këtë temë duket se mbetet i turbullt. Qeveria shqiptare ende nuk ka arritur të artikulojë qartë se sa gjini “ka vendi ynë zyrtarisht”: dy, tre apo më shumë? Ironikisht, ne vazhdojmë të humbasim në diskutime abstrakte, ndërsa vende të tjera marrin vendime të qarta, për mirë a për keq.

Në një kohë kur BE flet për standardizim, të drejta dhe politika të unifikuara, Shqipëria duket ende e pasigurt – njëlloj si tek shumica e çështjeve ku duam të jemi “pjesë e Europës”, por shpesh nuk arrijmë të biem dakord as me vetveten.