Apple ka rritur ndjeshëm vlerën e programit të saj të sigurisë, duke ofruar shpërblime deri në 1 milion dollarë për hakerët etikë apo studiuesit që arrijnë të zbulojnë dobësi të rralla në sistemet e saj.

Programi i njohur si Apple Security Bounty shpërblen studiuesit e sigurisë që raportojnë bug-e të verifikuara në iPhone, Mac, iCloud dhe shërbimet e inteligjencës artificiale të kompanisë.

Shpërblimi më i lartë

Shifra rekord prej 1 milion dollarësh rezervohet për raste jashtëzakonisht të rralla, siç është një sulm “zero-click” që lejon ekzekutimin e kodit në kernel-in e iOS pa asnjë veprim nga përdoruesi.

Po ashtu, Apple ka zgjeruar skemën duke ofruar shpërblim deri në 1 milion dollarë për ata që arrijnë të komprometojnë Private Cloud Compute, infrastrukturën e re që fuqizon funksionet e Apple Intelligence.

Pse e bën Apple këtë?

Kompania shpjegon se qëllimi është të tërheqë ekspertë nga e gjithë bota, duke i përfshirë ata në një “garë të shëndetshme” për të forcuar mbrojtjen e produkteve dhe të dhënave të përdoruesve.

Në këtë mënyrë, Apple jo vetëm që identifikon dhe rregullon më shpejt problemet, por njëkohësisht forcon imazhin e saj si një kompani që ka privatësinë dhe sigurinë në qendër të filozofisë së saj.

Siguria si prioritet

Me rritjen e përdorimit të shërbimeve cloud dhe integrimin e inteligjencës artificiale, kërcënimet kibernetike janë më të larta se kurrë. Për këtë arsye, Apple po investon fort për të siguruar që sistemet e saj të jenë sa më të fortifikuara – dhe është gati të paguajë shtrenjtë për këtë.