Në një rast që ka tërhequr vëmendjen e mediave amerikane, Mike Weirsky nga New Jersey u bë fitues i 273 milionë dollarëve në Mega Millions, vetëm pak muaj pas finalizimit të divorcit të tij.

Çifti kishte qenë i martuar për rreth 15 vite dhe, pas ndarjes, gjykata i kishte vendosur ish-bashkëshortes, Eileen Murray, detyrimin për të paguar alimentacion për pesë vite. Vendimi kishte ardhur pas vështirësive të Weirsky për të mbajtur një punë të qëndrueshme gjatë martesës.

Reagimi i ish-bashkëshortes

Pas fitores së papritur, Murray ka shprehur hapur frustrimin e saj. Në një intervistë për mediat amerikane, ajo u shpreh se pagesat e alimentacionit tashmë janë vetëm “xheparakë” për një person që është bërë papritur jashtëzakonisht i pasur.

Megjithatë, Murray theksoi se nuk ka ndërmend të kërkojë pjesë nga fitimi i lotarisë, por kërkesa e saj kryesore është ndërprerja e menjëhershme e marrëveshjes së alimentacionit.

Një debat ligjor dhe moral

Rasti ka ngritur diskutime mbi mënyrën se si duhet të trajtohen marrëveshjet financiare pas divorcit kur ndodhin ndryshime drastike në gjendjen ekonomike të njërit prej ish-bashkëshortëve.

Ekspertët ligjorë theksojnë se fitoret e lotarisë, ndryshe nga të ardhurat e zakonshme, mund të konsiderohen faktorë që justifikojnë rishikimin e kushteve të alimentacionit.

Për momentin, vendimi i fundit mbetet në duart e gjykatës, ndërsa historia e Mike Weirsky vazhdon të shkaktojë reagime të shumta në opinionin publik – një shembull i qartë i mënyrës sesi fati mund të përmbysë brenda natës ekuilibrat financiarë dhe personalë.