Një incident i pazakontë ndodhi në skenën e Teatrit të Operas dhe Baletit në Tiranë gjatë shfaqjes së operës “Traviata”.

Sopranoja e njohur Eva Golemi u rrëzua në fund të aktit, në një moment dramatik të shfaqjes, pasi partneri i saj tenor nuk arriti ta mbante sipas kërkesës së regjisurës. Ngjarja u pasua me tronditje të madhe në sallë, ndërsa artistja mbeti e shtrirë në skenë për disa çaste.

Burime pranë institucionit konfirmojnë se Golemi ka pësuar një frakturë të legenit, duke e bërë incidentin edhe më serioz. Ende nuk dihet se si do të ndikojë kjo në vazhdimësinë e shfaqjeve dhe në rikuperimin e artistes.

Publiku, i cili fillimisht mendoi se ishte pjesë e lojës skenike, u përball me realitetin vetëm kur artistët ndaluan interpretimin. Shumë prej tyre shprehën shqetësim në rrjete sociale, duke ngritur pyetje mbi masat e sigurisë për artistët gjatë skenave të vështira fizike.

Ngjarja e së dielës mbetet një moment i dhimbshëm për artdashësit dhe për Teatrin e Operas, ndërsa sopranoja Golemi pritet të qëndrojë jashtë skenës për një periudhë kohe deri në rikuperimin e plotë.